வெண்டைக்காய் பொடி பொரியல் | vendaikai podi poriyal recipe in tamil | bhindi podi fry in tamil

வெண்டைக்காய் எனக்கு ரொம்ப பிடிச்ச ஒரு காய். அதை வெச்சு புதுசா ஏதாச்சும் செஞ்சு பார்த்துட்டே இருப்பேன். அப்படி பண்ணினது தான் இந்த வெண்டைக்காய் பொடி பொரியல். கடலை பருப்பு , உளுத்தம் பருப்பு , வேர்க்கடலை எல்லாம் சேர்த்து வறுத்து அரைச்சு வதங்கிய வெண்டைக்காய் கூட சேர்த்து செய்யணும். ரொம்ப நல்லா இருக்கும் நீங்களும் செஞ்சு பாருங்க.

தேவையான பொருட்கள்:

வெண்டைக்காய் - 1/4 கிலோ

ஜீரகம் - 1 தேக்கரண்டி

எண்ணெய் - 1 மேஜைக்கரண்டி

வறுத்து அரைப்பதற்கு:

கடலை பருப்பு - 1/2 மேஜைக்கரண்டி

உளுத்தம் பருப்பு - 1 மேஜைக்கரண்டி

வேர்க்கடலை - 1 மேஜைக்கரண்டி

வர மிளகாய் - 2

கருவேப்பில்லை - 1 கொத்து

தேங்காய் துருவல் - 2 - 3 மேஜைக்கரண்டி

செய்முறை விளக்கம் :

1. வெண்டைக்காயை கழுவி ஒரு காட்டன் துணி கொண்டு தண்ணீரை சுத்தமாக துடைத்துக் கொள்ளவும்.பின் வெண்டைக்காயை சிறு சிறு துண்டுகளாக வெட்டிக் கொள்ளவும்.
   
2. ஒரு வாணலியில் கடலைப் பருப்பு உளுத்தம் பருப்பு வர மிளகாய் கருவேப்பில்லை அனைத்தும் சேர்த்து பொன்னிறமாக வறுக்கவும். இவற்றை ஒரு தட்டத்திற்கு மாற்றவும்.
   
3. பின் வேர்க்கடலையை 1 நிமிடம் வறுத்துக் எடுத்துக் கொள்ளவும். பின் தேங்காய் துருவலை 2 நிமிடம் வறுக்கவும். 
   
4. வறுத்த பொருட்கள் அனைத்தையும் மிக்ஸியில் போட்டு கொரகொரப்பாக அல்லது நைசாக அரைத்துக் கொள்ளவும். அரைக்கும் பொழுது சிறிது இடைவெளி விட்டு விட்டு அரைக்கவும் இல்லையேல் கட்டி சேர்ந்துவிடும். நான் கொரகொரப்பாக அரைத்துள்ளேன். 
   
5. ஒரு வாணலியில் எண்ணெய் ஊற்றி ஜீரகம் போட்டு பொரிந்ததும் வெண்டைக்காய் மற்றும் உப்பு சேர்த்து 10 நிமிடம் வரை மிதமான தீயில் வதக்கவும்/ வெண்டைக்காயின் மேல்தோல் மொறுமொறுவென ஆகும் வரை வதக்கவும்.
   
6. வெண்டைக்காய் நன்கு வதங்கிய பின் அரைத்துவைத்துள்ள பொடியை சேர்த்து கிளறி இறக்கினால் சுவையான வெண்டைக்காய் பொடி பொரியல் தயார்.
   

ரசம் மற்றும் தயிர் சாதத்தோட ரொம்ப நல்லா இருக்கும்:)

என் குறிப்பு :

1. வேர்க்கடலை சேர்ப்பதனால் அரைக்கும் பொழுது சிறிது இடைவெளி விட்டு விட்டு அரைக்கவும் இல்லையேல் கட்டி சேர்ந்துவிடும்.